कोरोना आणि लॉकडाऊन या शब्दांनी अनेकांचे रोजगार हिरावले. सर्वत्र आर्थिक मंदीची लाट आली. पण याच भीषण संकटात एका महिला शेतकऱ्याने चक्क ५ लाखांची कमाई केलीये. विश्वास बसत नाहीये ना?
ही थक्क करणारी यशोगाथा आहे मावळ परिसरातील रुपाली नितीन गायकवाड यांची. मावळ म्हणजे तसा भातशेतीचा पट्टा. तिथे इतर पिकं घेण्याचं धाडस कुणी सहसा करत नाही. पण रुपाली यांनी हा पायंडा मोडला. त्यांनी अवघ्या ३० गुंठ्यांत कलिंगड आणि काकडीचा दुहेरी प्रयोग केला.
Dual Crop Farming: दुहेरी पीक घेण्याचा यशस्वी प्रयोग
नेमकं कलिंगड विक्रीला आलं आणि लॉकडाऊन लागला. सगळे रस्ते आणि मार्केट बंद झाले. पण रुपाली डगमगल्या नाहीत. त्यांनी संकटालाच संधी बनवली. थेट शेताच्या बांधावरून व्यापाऱ्यांना १५ रुपये किलो या दराने त्यांनी कलिंगड विकलं.
कलिंगड संपताच त्यांनी तिथेच न थांबता त्याच ३० गुंठ्यांत लगेच काकडीची लागवड केली. आता एका तोडणीत त्यांना तब्बल ८०० ते ९०० किलो काकडी मिळतेय. महिन्याकाठी दहा टन काकडी निघेल, असा त्यांना ठाम विश्वास आहे.
थोडक्यात सांगायचं तर, या दुहेरी पिकासाठी त्यांना एकूण फक्त १ लाख रुपये खर्च आला. त्यातून त्यांनी तब्बल ५ लाख रुपयांचा निव्वळ नफा कमावला आहे. अडचणीच्या काळात रडत न बसता शेतीत प्रयोग केले, तर हमखास यश मिळतं, हेच रुपाली यांनी सिद्ध करून दाखवलंय.
